Deu 34 | NdeIBE | STEP | UMosi wasekhwela eNtabeni yase-Nebho evelela emagcekeni akoMowabi esiya phezu kwePhisiga, nganeno ngaphetsheya malungana leJerikho. Kukhonale uJehova amtshengisa khona ilizwe lonke

Deuteronomy 34

Ukufa kukaMosi

1 UMosi wasekhwela eNtabeni yase-Nebho evelela emagcekeni akoMowabi esiya phezu kwePhisiga, nganeno ngaphetsheya malungana leJerikho. Kukhonale uJehova amtshengisa khona ilizwe lonke – kusukela eGileyadi kusiya kwelikaDani, 2 lonke elikaNafthali, ilizwe lika-Efrayimi lelikaManase, lonke ilizwe likaJuda kusiyafika elwandle olungentshonalanga, 3 iNegebi kanye lomhlaba wonke osuka eSigodini saseJerikho, iDolobho laMalala, kusiya kude khonale eZowari.

4 Ngakho uJehova wathi kuye, “Leli yilo ilizwe engathembisa ngesifungo u-Abrahama, u-Isaka loJakhobe, lapho engathi khona, ‘Ngizalinika izizukulwana zenu.’ Ngikuvumele ukuthi ulibone ngawakho amehlo, kodwa awusoze uchaphele kulo.”

5 Ngakho uMosi inceku kaJehova wafela khonapho kwelamaMowabi, njengokwakutshiwo nguJehova. 6 Wamngcwaba eMowabi, esigodini esikhangelene leBhethi-Phewori, kodwa kuze kube lamuhla lokhu kakho loyedwa olaziyo ingcwaba lakhe. 7 UMosi wayeseleminyaka elikhulu lamatshumi amabili ekufeni kwakhe, ikanti amehlo akhe ayesabona kuhle njalo engakaphelelwa ngamandla.

8 Abako-Israyeli bamlilela uMosi emagcekeni aseMowabi okwezinsuku ezingamatshumi amathathu, kwaze kwedlula izinsuku zokukhala lokulila.

9 UJoshuwa indodana kaNuni wayegcwele umoya wokuhlakanipha ngoba uMosi wayembeke izandla. Ngakho abako-Israyeli bamlalela njalo benza lokho uJehova ayekulaye uMosi.

10 Kusukela lapho, kakukabi lomunye njalo umphrofethi ko-Israyeli onjengoMosi, owayesaziwa nguJehova ubuso ngobuso,

11 owenza zonke lezozimanga lezibonakaliso ayethunywe nguJehova ukuba ayezenza eGibhithe – kuFaro lakuzo zonke izikhulu zakhe lakulo lonke ilizwe lakhe. 12 Ngoba kakho okakaze atshengisele amandla amakhulu kangako loba ukwenza izenzo ezesabekayo uMosi azenzayo emehlweni abo bonke abako-Israyeli.